(1) Yog ua qauv qha txug kev tsim tsaa hab kev tswjfwm rua
pawg ntseeg;
(2) Yog qha txug kev ua dlejnum ntawm pawg ntseeg moog
rua lub koomhum kws pawg ntseeg zwm kuas meej;
(3) Yog qha pawg ntseeg txug
Koomhum Qebsab lub luag
num kws yog pawg ntseeg lub qhov chaw ua Vaajtswv
teg dlej num moog thoob plawg nplajteb.
Txuj Kevcai Lijchoj rua pawg ntseeg
nuav tau raug tsim ntsaa hab txais yuav lug ntawm lub rooj saablaaj luj ntawm Koomhum Qebsab kws yog cov muaj txujcai sab
tshaajplawg huv Cov Ntseeg Yexus hab Kev Koomteg Qha Txuj Moo Zoo. Txhua pawg ntseeg tau muaj feem tsim txuj kevcai lijchoj
nuav lug ntawm puab cov sawvcev kws tau tuaj moog koom lub rooj saablaaj luj.
Lawv le txuj Kevcai Lijchoj nuav, pawg ntseeg
muajcai yuav tsim puab le Kevcai Lijchoj Ntxiv kuas tsim nyog hab txaus rua puab ua dlejnum huv pawg ntseeg. Pawg ntseeg huv
Cov Ntseeg Yexus hab Kev Koomteg Qha Txuj Moo Zoo yog ib feem ntawm lub koomhum kws nwg zwm hab ua phoojywg thoob nplajteb,
hab koom kev tswjfwm, kev phoojywg, hab kev ua dlejnum sub suavdlawg txhaj koom tau ib txuj kev ntseeg kws has tas, Yexus
yog tug Cawmseej, tug Ntxuav kuas Dlawbhuv, tug khu tau Mob zoo, hab yog tug Vaajntxwv kws yuav rov qaab lug, kuas yoojyim
rua kev tshaajtawm Txuj Moo Zoo tsi has rua cov huv zej zog hab txawv tebchaws lawv le Vaaj Ntsujplig tug dlawbhuv ua tug
coj.
PHAAJ I LUB NPE
Pawg ntseeg nuav tis lub npe hu ua, Pawg Moob Ntseeg Yexus hab Kev Koomteg Qha Txuj Moo Zoo Huv Zog
Banning. (Hmong Christian and Missionary Alliance Church of KEVCAI Banning)
PHAAJ II KEV ZWM
Pawg ntseeg nuav
yog ib pawg kws raug lug zwm hab nyob huv qaab kev tswjfwm ntawm Cov Ntseeg Yexus hab Kev koomteg Qha Txuj Moo Zoo kws yog
lub hauvpaug. Yog nub twg pawg ntseeg tsi muaj nyob lawm lossis tsi ua lawv le tej homphaj, tej kevcai, tej kev ntseeg, hab
kev qha ntawm Cov Ntseeg Yexus hab Kev Koomteg Qha Txuj Moo Zoo, tes txhua yaam qub txheeg qubteg, cuabyeej toomtxeem, khoom
vaaj khoom tsev kws yog pawg ntseeg le lossis muaj nyob ntawm pawg ntseeg yuav tsum poob hab dlhau moog ua qubtxeeg qubteg
rua Hauvpaug Koomhum Moob Qha Txuj Moo Zoo (Hmong District).kws muaj cai tswj fwm pawg ntseeg lawv le txuj kevcai kws pawg
ntseeg nuav zwm. Pawg ntseeg tej ntaub ntawv kws ua zwm rua numtswv yuav tsum raug cov tsaavxwm huv lub Koomhum kws nwg zwm
pum zoo hab yuav yog muaj nqai thim qubtxeeg qubteg nuav losis muaj nqai kws yuav thooj le nqai nuav lawv le kevcai lijchoj
huv Hauvpaug Koomhum Qebsab tau teev tseg.
PHAAJ III - THAUS CHIV MUAJ HAB THAUS XAUS
Feem 1. Thaus Chiv Muaj Pawg Ntseeg
Pawg ntseeg nuav tau chiv muaj nyob rua huv lub zog Banning txij le thaus lub 9 hlis ntuj, xyoo 1985 lug lawm.
Feem
2. Thaus Yuav Xaus Pawg Ntseeg.
Pawg ntseeg nuav yuav tsi muaj noob nyoog xaus tshwj yog cov tswvcuab tsawg
tshaaj le 25 leeg rua huv hab tshwj yog raug numtswv muab kaw tsi pub muaj lawm xwb.
Feem 3. Chaw Pehawm Vaajtswv.
a. Pawg ntseeg lub chaw pehawm Vaajtswv, yog cov tswvcuab feem coob nyob rua lub zog twg, lub chaw pehawm Vaajtswv
yuav tsum nyob ze rua lub zog ntawd. Txawm yuav tshai chaw moog rua qhov twg los yeej tau kuas yuav tsum yog tau kev tsocai
lug ntawm ib tsoom tswvcuab txug suab 2/3 pum zoo mas txhaj txaav tau.
b. Lub chaw xaa ntawv (P.O. Box) yuav tsi pub
txaav moog dleb dlhau lub zej zog kws pawg ntseeg nyob hab yuav tsi pub hloov tug P.O.Box number tshwj yog lub Tsev Xaa Ntawv
(Post Office) kuas hloov mas txhaj hloov tau.
c. Cov kws muaj cai moog qheb hab muab ntaub ntawv huv lub P.O.Box,
yuav tsum yog ib tug tsaavxwm huv Lub Rooj Tsaavxwm lossis yog tug xwbfwb xwb.
PHAAJ IV - PAWG NTSEEG LUB HOMPHAJ
Pawg ntseeg lub homphaj yog muaj 3 feem luj le huv qaab nuav xwsle:
Feem 1. Kev Xaa Txuj
Moo Zoo.
Pawg ntseeg lub homphaj rua Kev Xaa Txuj Moo Zoo, yog npaaj kuas muaj kev txhawb dlaagzug lug ntawm lub rooj
txhawb nqaa kev Xaa Moo Zoo, kev paab nyaj txag rua peev nyaj Xaa Txuj Moo Zoo ntawm Koomhum Moob hab Koomhum Qebsab (Great
Commission), hab xaa tuabneeg moog tshaajtawm Txuj Moo Zoo moog rua cov tsi tau ntseeg, tsi has cov kws nyob huv tebchaws
nuav hab nyob txawv tebchaws.
Feem 2. Kev Cob Qha hab Kev Kawm Txuj.
Pawg ntseeg yuav txhawb
hab tsaa kuas muaj kev cob qha hab kev kawm ntau yaam lug txhawb cov tswvcuab tsi has saab ntsujplig hab saab nqaj tawv huvsi.
Kev cob qha yog tej yaam le nuav, xwsle; kev kawm Vaajlugkub; kawm nkauj; kawm kev ua thawj coj, kawm kev tswjfwm; kawm ntawv
Moob hab lwm yaam ntawv; hab txhawb kuas cov tswvcuab muaj kev kawm txujci sab moog rua txhua phaab
Feem 3.
Rooj Txhawbsab.
Txhua lub xyoo, pawg ntseeg yuav tsaa kuas muaj ntau lub rooj txhawb sab, lug txhawb pawg ntseeg tej
kev tu-ncua lawv le pawg ntseeg pum zoo.
PHAAJ V KEV ZWM UA TSWVCUAB
Feem 1. Kev Zwm Ua Tswvcuab
a. Tug kws xaav zwm ua tswvcuab yuav tsum tau sau npe rua dlaim ntawv thov nkaag ua tswvcuab hab tom qaab ntawd yuav
tsum tau ntsib xwbfwb hab cov txwjlaug kws yuav tau nrug thaam txug puab lub neej kws lug ntseeg Vaajtswv hab kev mob sab
siv zug paab pawg ntseeg nuav. Tug xwbfwb hab cov txwjlaug maam le saib lawv le puab dlaim ntawv thov nkaag ua tswvcuab. Puab
maam le sau ntawv moog rua pawg ntseeg kws yim ntawd tau tshai chaw tawm lug, kuas pawg ntseeg ntawd xaa puab tej npe tuaj
rua pawg ntseeg tshab nuav.
b. Cov mivnyuas los puav leej suav tau ua tswvcuab huv tuabsi yog has tas tug xwbfwb hab cov txwjlaug
pum zoo hab tau moog nrug cov ua nam ua txiv sis thaam taag lawm, hab pum tau has tas cov mivnyuas ntawd yeej tsim nyog lug
ua tswvcuab lawv le tej lug kws tau teev tseg rua huv nuav.
c. Txhua tug kws nkaag lug ua tswvcuab yuav tsum tau txais ib phoo kevcai lijchoj, yuav tsum tau nyeem
hab txaus sab coj ua lawv le txuj kevcai lijchoj ntxiv ntawd. Dlhau le ntawd, puab yuav tsum leeg paub hab txaus sab hlo coj
ua lawv le txujcai qhuab ntuag, kev coj rov lug sis raug zoo, hab kev has plaub kws yeej muaj nyob rua huv C&MA phoo kevcai
lijchoj ntawm E8-1 moog txug rua E8-14, (1999 Edition). Thaus suavdlawg txaus sab coj hab pum zoo yuav lawv le tej kevcai
ntawd lawm, puab maam lug suam puab cov npe rua ntawm dlaim ntawv thov zwm ua tswvcuab.
Feem 2. Tswvcuab
Tej Ntaub Ntawv.
a. Cov tswvcuab kws kub sab (Active Membership). Cov tswvcuab kws kub sab yog cov kws muaj lub sab
npuab hab coj ua lawv le tej lug kws tau teev tseg nyob rua huv phoo kevcai lijchoj hab phoo kevcai lijchoj ntxiv, hab yeej
kubsab lug tuaj pehawm Vaajtswv huv lub tuamtsev nuav.
b. Cov Tswvcuab Kws Tsi Kubsab (Inactive Membership).
1. Cov kws tshai chaw tawm ntawm lub zej lub zog moog
Lawm, tabsis tsi tau xaa puab cov ntaub ntawv ua
tswvcuab moog rua pawg ntseeg tshab, cov ntawd yuav
raug nyob rua huv cov tswvcuab kws tsi kub sab cov npe.
Pawg ntseeg yuav tau sau ib tsaab ntawv moog qha rua
puab paub txug qhov nuav.
2. Txhua tug, tsuas tshwj tug kws muaj mob muaj nkeeg
losis tawm moog rua saab nrau ib ntug xwb kws cale tsi
tuaj nrug cov ntseeg koom kev pehawm Vaajtswv le
ntawm ib lub xyoos losis ntev dlua ntawd, tug ntawd yuav
raug muab nyob rua huv paab kws tsi kub sab cov npe.
Pawg ntseeg yuav tau sau ib tsaab ntawv rua puab paub
txug qhov nuav.
3. Tug tswvcuab kws tseem nyob rua huv cov kws tsi kub
sab, muaj peevxwm dlhau moog nyob tau rua huv paab
tswvcuab kws kub sab tej npe, yog has tas nwg thov tuaj
hab raug kev pum zoo lug ntawm tug thawj xwbfwb hab
cov txwjlaug.
4. Tug tswvcuab kws tsi kub sab nuav tsi muaj cai tawm
suab (vote) rua ib teg num dlaab tsi, hab tsi muaj cai xaiv
nwg lug tuav ib teg num twg.
Feem 3. Npe Tswvcuab
a. Txhua xyoo, thaus lub kaum-ob hlis ntuj, tug xwbfwb hab cov txwjlaug yuav tsum tshuaj saib cov npe
tswvcuab sub pawg ntseeg txhaj yuav paub has tas cov tswvcuab yog muaj pitsawg leej tag. Tom qaab kws tau siv sijhawm nug
cov tswvcuab kws tseem nyob rua huv paab tsi kub sab tej npe hab taug saib puab txuj kev phooj ywg nrug pawg ntseeg zoo le
caag lawm. Thaus ntawd maam le muab cov npe ntawd moog cob rua lub rooj Tsaavxwm.
b.
Lub Rooj Tsaavxwm muaj cai rhu tug kws nyob huv paab tswvcuab kws tsi kub sab lug nyob rua paab kws kub sab tom qaab kws nwg
tub nyob huv tau ib xyoos lawm losis rov ca nwg nyob nwg huv paab kws tsi kub sab ntawd ib lub xyoos ntxiv. Lub Rooj Tsaavxwm
yuav tau sau ib tsaab ntawv moog qha rua tug tswvcuab ntawd kuas nwg paub txug qhov nuav.
Feem 4.
Kev Hloov Tswvcuab
Yog has tas cov tswvcuab huv pawg ntseeg txaav chaw moog rua lwm qhov, puab muaj cai thov pawg
ntseeg ua ib dlaim ntawv xaa puab moog rua lwm pawg ntseeg lug ntawm kev tso cai ntawm tug xwbfwb hab cov txwjlaug.
Feem
5. Cov Kws Tsim Nyog Txais Ua Tswvcuab
Cov kws tsim nyog txais lug ua tswvcuab yog cov kws txaussab coj lub
neej lawv le txuj kev ntseeg huv qaab nuav:
a. Leeg lug ntseeg Yexus hab ua lub neej
lawv le kev yug dlua tshab lawm.
b. Muaj kev ntseeg huv Vaajtswv kws yog Vaajleejtxiv,
Vaajleejtub, hab Vaajntsujplig tug Dlawbhuv; ntseeg hab leeg has tas, Vaajlugkub yeej yog Vaajtswv Txujlug ib txhab ib txhis;
ntseeg has tas, Tswv Yexus tau lug tuag theej suavdlawg lub txhoj lawm; ntseeg has tas, muaj kev cawmdlim rua txhua tug kws
ntseeg Tswv Yexus hab muaj kev teemtxim moog ib txhis rua txhua tug kws tsi txais yuav Tswv Yexus.
c.
Txais yuav txuj kev ntseeg kws has tas, Tswv Yexus yog tug Cawmseej, tug Ntxuav kuas Dlawbhuv tau, tug Khu tau Mob zoo, hab
yog tug Vaajntxwv kws yuav rov qaab lug yaav peg suab nuav.
d. Yuav tsum yog tug
kws txaus sab rua kev coj noj coj ua lawv le pawg ntseeg lub homphaj, tej kev lig kevcai, hab kev tswjfwm. Nwg yuav tsum txaus
sab sis paab ris nraa tsi has dlaag zug, tswvyim hab nyaj txag tsi has nyaj ib feem kaum, nyaj sab dlawb, hab nyaj cog lug,
hab muaj kev koomteg nrug txhua phaab dlejnum huv pawg ntseeg.
PHAAJ VI TXUJ CAI NTAWM TSWVCUAB
Feem
1. Txuj Cai Ntawm Tug Kws Ua Kevcai Rausdlej
Tug kws ua kevcai rausdlej lawd, nwg muaj cai noj Tswv Yexus
Rooj Mov tau, muaj cai tawm suab pov ntawv, muaj cai tawm tswvyim hab muaj cai tuav dlejnum yog has tas nwg muaj noob nyoog
16 xyoo rov rua sau
Feem 2. Txujcai Ntawm Tug Tsi Tau Ua Kevcai Rausdlej.
Tug kws tsi tau
ua kevcai rausdlej, nwg tsi muaj cai noj Tswv Yexus Rooj Mov hab tsi muaj cai tuav ib lub meej mom dleeb tsi huv pawg ntseeg.
Yog nwg muaj noob nyoog 16 rov rua sau lawd, nwg muaj cai pov ntawv hab tawm tswvyim tau.
Feem 3.
Txuj Cai Thov Tawm Tswvcuab.
Pawg ntseeg yuav tsi txwv los taav tug kws tsi xaav ua tswvcuab rua huv pawg ntseeg lawd
yog has tas, nwg tsi nyam pawg ntseeg tej kev coj noj coj ua, tej kevlig kevcai hab tej kev tswjfwm. Tug ntawd muaj cai thov
tawm tau.
Feem 4. Kev Taag Noobnyoog Ua Tswvcuab
Yog ib tug tswvcuab twg lossis ib yim tswvcuab
twg, tsi xaa puab dlaim ntawv zwm ua tswvcuab nrug rua $1.00 nyaj ntawm ib tug tuabneeg huv yug tsev tuabneeg tuaj rua Lub
Rooj Tsaavxwm lawv le lub caij nyoog kws tau teem tseg rua thaus lub ib hlis ntuj, tim kaumtsib (January 15), tes tug ntawd
los yim ntawd taag noob nyoog ua tswvcuab rua huv pawg ntseeg lawm. Qhov kws nwg hab nwg tsev tuabneeg yuav rov qaab lug zwm
dlua, yuav tsum yog rov qaab ua dlua ntaub ntawv tshab hab them nyaj tuaj. Tom qaab ntawd cov txwjlaug hab xwbfwb maam le
txuas noobnyoog ntxiv.
Feem 5. Kev Tximkhu, Kev Rau Txim hab Muab Rhu
Tawm Tswvcuab.
Yog
ib tug tswvcuab twg poob rua huv ib txuj kev txhum kws tau teev rua huv qaab nuav, pawg ntseeg muaj cai qhuab ntuag tug ntawd
hab rau txim rua tug ntawd lawv le txuj cai ntawm Cov Ntseeg Yexus hab Kev Koomteg Qha Txuj Moo Zoo.
a. Ua txhum Vaajtswv
Txujlug lawv le tej yaam nraag qaab
nuav:
(1) Ua txhum kev nkauj kev nraug, tsi ncaaj nceeg rua saab
nyaj txag lossis qaug rua kev twv txaj yuam pov, tsi
ncaaj nceeg rua kev laag kev luam, tsi them tej nuj nqes
kws nwg tshuav luas tug, tsi fwm cov thawj coj kws
Vaajtswv tsaa lug saib yug lawv le C&MA kevcai lijchoj
tau kom tseg.
(2) Ua tej yaam tsi tsim nyog (imprudent) kws Vaajtswv
Txujlug tau txwv lawm. ( Imprudent conduct is conduct
that demonstrates a lack of moral discrection).
b. Tau qha (promulgation) lwm zaaj kev ntseeg kws tsi thooj lawv le txuj kev ntseeg ntawm Cov Ntseeg
Yexus hab Kev Koomteg Qha Txuj Moo Zoo.
c. Ua txhum numtswv kevcai kws taug tau has tas muaj tseeb tag.
PHAAJ VII TEJ KEVCAI
Kevcai
rausdlej hab noj tug Tswv Yexus rooj mov yog ob txuj kevcai ntawm pawg ntseeg kws yuav tsum tau coj hab ua lawv le Tswv Yexus
tug yaam ntxwv.
Feem 1. Kevcai Rausdlej.
Kevcai rausdlej yog yuav tsum muab raus hlo rua
huv dlej. Tug kws tub ua kevcai rausdlej taag nyob rua lwm paab (denomination) lawm tabsis yog nwg ho lug zwm ua tswvcuab
rua huv pawg ntseeg, tug ntawd yuav tau rov ua dlua tshab kuas lawv le C&MA txuj kev ntseeg.
Feem 2. Kev Noj Tswv Yexus Rooj Mov.
Kev noj Tswv Yexus rooj mov, ib hlis twg yuav tsum tau
ua ib zag. Lub sijhawm yog muab tso rua ntawm thawj lub limtam huv txhua lub hlis. Tug xwbfwb yog tug kws coj suavdlawg noj
txhua zag tabsis yog thaus xwbfwb tsi nyob lawd, cov txwjlaug muaj cai coj suavdlawg noj tau. Cov yuav npaaj dlej lab hab
mov ci yog paab txwjlaug ua cov npaaj txhua zag.
PHAAJ VIII - LUB ROOJ TSAAVXWM HUV PAWG
NTSEEG
Feem 1.
Lub Rooj tsaav xwm.
Lub rooj tsaavxwm huv pawg ntseeg yuav tsum muaj yaam tsawg yog 5 leeg rov rua sau. Lub rooj tsaavxwm
yog muaj lawv le nuav:
a. Tug xwbfwb laug hab lwm tug xwbfwb
b. Txhua tug txwjlaug
c. Tug teev ntawv
d. Tug
ca nyaj, hab
e. Lwm tug kws lub rooj saablaaj txwm xyoo pum zoo mua.
Feem 2. Tug Tswj Rooj Saablaaj.
a.
Tug xwbfwb yuav tsum ua tug thawj tsaavxwm rua lub Rooj Tsaavxwm lossis yog nwg thov tsi pum zoo ua, lub Rooj Tsaavxwm maam
le xaiv ib tug txwjlaug huv lub Rooj Tsaavxwm lug ua. Yuav tau xaiv ib tug txwjlaug lug ua tug lwm tsaavxwm hab.
b. Lub
Rooj Tsaavxwm yuavtsum muaj kev saablaaj; kev thov Vaajtswv ib hlis twg ib zag, hab muaj kev tshaabxus rua pawg ntseeg paub
txug pawg ntseeg tej dlejnum. Kev tshaabxu yog yuav tau tshaabxus txug tej dlejnum ntawm txhua phaab hab tshaabxu txug pawg
ntseeg tej nyaj txag kws tau lug hab siv tawm. Kev tshaabxus yuavtsum yog tshaabxus lug ntawm ntaub ntawv teev khaws ca.
c.
Kev saablaaj tshwjxeeb ntawm lub Rooj Tsaavxwm yuav tsum yog tug thawj tsaavxwm ua tug hu losis yog ib nraab ntawm cov tub
tsaavxwm sau ntawv thov kuas saablaaj. Txhua tug tub tsaavxwm, cov saib dlejnum, hab koomhum txhua paab txhua pawg yuav tsum
nyob huv qaab kev tswjfwm ntawm lub rooj tsaavxwm. Tsuas tshwj cov kaavxwm saib kev xaiv tsaa xwb.
PHAAJ IX COV
TUB TSAAVXWM
Feem 1. Tug Kws Tsim Nyog Xaiv Lug Ua Cov Tub
Tsaavxwm:
Cov tub tsaavxwm yuav tsum yog tswvcuab
ntawm pawg ntseeg hab yuav tsum yog cov kws ua tau lub neej lawv le Vaajtswv Txujlug huv I Timautes 3:1-13 tau qha tseg.
Cov
tsaavxwm yog cov kws muaj meej mom le nraag nuav, hab yuav tsum raug xaiv lug ntawm lub rooj saablaaj txwm xyoo tsuas tshwj
tug xwbfwb xwb. Tug Xwbfwb, cov Kev Txwjlaug, tug Teev Ntawv, tug Ca Nyaj, tug Paab Tug Ca Nyaj, tug Ca Nyaj Tshaajtawm Txuj
Moo Zoo, cov Tub Ncignum, cov Nam Ncignum, tug Saib Kev Xaa Moo Zoo, tug Saib Qubtxeeg Qubteg, tug Saib Komtswj hab Kev Hunkauj,
tug Nrhav Nyaj Txag, ob tug Tshuaj Nyaj, tug Saib Kev Kawm Nubkaaj, Thawj Namtsev, Thawj Txivtsev, cov Tuavxaam rua cov hluas,
hab Thawj Tub Ntxhais Hluas.
PHAAJ X- XWBFWB
Lub Rooj Tsaavxwm tsi xob txais ib leeg tug twg lug ua xwbfwb
rua pawg ntseeg ua ntej. Yog Thawj Tsaavxwm huv Hauvpaug Koomhum tsi tau tso cai. Tug xwbfwb yuav tsum yog ib tug kws lub
rooj tsaavxwm huv pawg ntseeg hu hab yog tug Thawj Tsaavxwm tau pum zoo tom qaab kws nwg tau nrug lub Rooj Tsaavxwm thaam
lawm.
Tug thawj Tsaavxwm huv Hauvpaug Koomhum muaj cai muab tswvyim rua Lub Rooj Tsaavxwm txug tej xwbfwb kws nwg
pum has tas tsim nyog ua tau xwbfwb rua pawg ntseeg. Thawj tsaavxwm huv Hauvpaug Koomhum tsaa leej twg ua xwbfwb rua pawg
ntseeg tes tug xwbfwb ntawd hab nwg tug quaspuj dlhau moog ua tswvcuab rua pawg ntseeg. Tug xwbfwb yuav tawm tsi ua xwbfwb
rua pawg ntseeg los tau, nwg yuav tsum tau ua ntawv has txug nwg kev tawm rua thawj Tsaavxwm huv Hauvpaug Koomhum hab rua
lub Rooj Tsaavxwm huv pawg ntseeg. Lub Rooj Tsaavxwm nrug rua Thawj Tsaavxwm huv Hauvpaug Koomhum los muaj cai thov kuas xwbfwb
tawm.
PHAAJ XI - DLEJNUM NTAWM COV TUB
TSAAVXWM HUV PAWG NTSEEG
Feem 1. Tug Xwbfwb.
Xwbfwb
yog tug kws saib txhua yaam dlejnum huv pawg ntseeg. Nwg yog tug thawj tsaavxwm huv lub Rooj Tsaavxwm tsuas ntshai nwg ho
xaiv ua lawv le Phaaj VIII. Feem 2 nqai b. Nwg yuav tsum ua tug tswj rooj saablaaj txhua zag losis kev saablaaj tshwjxeeb
huv pawg ntseeg tuabsi. Nwg muaj cai nrug txhua phaab txhua pawg huv pawg ntseeg saablaaj. Yog pawg ntseeg twg tsi muaj tug
xwbfwb, tug thawj tsaavxwm losis lwm tsaavxwm muaj cai saib txhua yaam dlejnum huv pawg ntseeg nrug rua Thawj Tsaavxwm huv
Hauvpaug Koomhum Moob.
Feem 2. Cov Txwjlaug
Cov txwjlaug yog cov nrug xwbfwb saib dlejnum ntawm saab ntsujplig
rua pawg ntseeg. Puab yog paab kws saib kev txais cov lug ua tswvcuab. Puab yog paab saib kev tu plaub ntug kuas lawv le kevcai
tu plaub ntug hab kev kom ntawm Cov Ntseeg Yexus hab Kev Koomteg Qha Txuj Moo Zoo.
Puab yog cov nrug xwbfwb moog thov
Vaajtswv rua cov tswvcuab hab moog saib cov tswvcuab tsi has huv vaaj huv tsev, huv tsev khu mob hab huv tsev lojcuj. Puab
yog cov yuav qhuab qha thaus xwbfwb tsi nyob hab qhuab ntuag txhua tug tswvcuab kws poob rua kev txhum. Hab Puab yog cov npaaj
Tswv Yexus rooj mov txhua zag kws muaj.
Feem 4. Tug Teev Ntawv.
Tug teev ntawv yuav tsum teev tej lug saablaaj ntawm pawg ntseeg hab ntawm lub Rooj Tsaavxwm, hab ua
dlejnum rua pawg ntseeg lawv le lub Rooj Tsaavxwm kuas nwg ua. Nwg yog tug kws khaws pawg ntseeg tej ntaub ntawv txhua yaam
ca kuas zoo npaum le zoo tau hab muab tej ntaub ntawv ntawd teeb kuas nyob muaj quas. Nwg yog tug sau ntaub ntawv hab teb
luas tej ntaub ntawv moog rua luas.
Feem 5. Tug Ca Nyaj.
Tug ca nyaj yuav tsum khaws tej nyaj kws yog txhua yaam nyaj txag huv pawg ntseeg tsuas tshwj cov nyaj
sab dlawb kws tso paab rua xwbfwb kev nojhaus hab cov nyaj kws has nyob rua ntawm Phaaj XII- Feem 2, hab cov nyaj kws tso
moog xaa txuj moo zoo yog has tas muaj Tug Ca Nyaj Tshaajtawm Txuj Moo Zoo lawm. Nwg yuav tsum them txhua yaam nuj nqes lawv
le lub Rooj Tsaavxwm kuas nwg them hab nwg yuav tsum teev hab khaws tej ntaub ntawv nyaj txag kws siv moog lug ca, nwg yog
tug sau ntawv txais nyaj rov rua cov tswvcuab kws tso nyaj, hab nwg yog tug ua cov ntaub ntawv tshaabxu rua koomhum Moob,
koomhum Qebsab, hab rua pawg ntseeg. Lub Rooj Tsaavxwm yog cov txav txim sab has tas, yuav muab cov nyaj coj moog khaws ca
rua Lub Txhaab- nyaj (Bank) twg. Txwv tsi pub tug ca nyaj moog sau nyaj ntawm pawg ntseeg tshwj lub rooj tsaavxwm tso cai
mas nwg txhaj ua tau. Txhua 3 lub hlis twg, nwg yuav tau ua tej ntawv tshaabxu nyaj txag hab tshaabxus rua pawg ntseeg paub
txug cov nyaj kws pawg ntseeg tau lug hab siv tawm tsi has; cov nyaj ib feem kaum (10%) ntawm txhua tug tswvcuab, cov nyaj
fij (offering), hab lwm yaam nyaj kws tau lug hab siv tawm.
Txhua txhua zag kws tug ca nyaj yuav rhu pawg ntseeg cov
nyaj tshaaj le $50.00 rov rua sau kws lub Rooj Tsaavxwm tsi tau thaam txug, nwg yuav tsum tau has rua lub rooj tsaavxwm paub
ua ntej. Hab txwv tsi pub nwg tseg cov nyaj rua huv tsev tshaaj le $50.00. Yog thaus pawg ntseeg cov nyaj pluj losis raug
tub saab nyag, nwg yuav tau hu tub ceevxwm tuaj ua dlaim ntawv povthawj hab qha rua lub Rooj Tsaavxwm paub kuas sai npaum
le sai tau. Yog pawg ntseeg cov nyaj pluj losis xyuam yaam tsi muaj hauvpaug hauv ntsis, tug ca nyaj yuav tau ntxiv coj nyaj
kws sem ntawd rov rua pawg ntseeg. Txwv tsi pub tug ca nyaj qev pawg ntseeg cov nyaj rua ib leeg tug twg coj moog siv rua
ib yaam dlaab tsi.
Feem 6. Tug Paab Tug Ca Nyaj.
Tug paab tug ca nyaj yuav tsum raug taw lug ntawm lub Rooj
Tsaavxwm ua tug taw losis raug xaiv lug ntawm lub rooj saablaaj txwm xyoo. Nwg yog tug lug saib teg dlejnum suav txhua yaam
nyaj tsuas tshwj cov nyaj sab dlawb kws tso paab xwbfwb, hab yuav tsum teev tej nyaj kuas muaj ntaub ntawv ca. Hab nwg yog
tug paab tug ca nyaj sau tej ntawv txais nyaj rua cov kws tau paab nyaj tuaj.
PHAAJ XII TEJ PAAB PAWG
Feem
1. Tug Ca Nyaj Tshaajtawm.
Tug ca nyaj tshaajtawm yuav tsum khaws tej nyaj kws tso moog Tshaajtawm Txuj Moo Zoo hab
ua tug saib kev xaa tej nyaj txag nuav moog rua tug ca nyaj tshaajtawm txuj moo zoo ntawm Cov Ntseeg Yexus hab Kev Koomteg
Qha Txuj Moo Zoo ua ntej nub tim 10 ntawm txhua lub hlis.
Feem 2. Cov Tub Ncig Num.
Cov tub ncignum yuav tsum
tau saib teg dlejnum kws yog kev nojhaus, kev txomnyem huv pawg ntseeg, hab saib kev paab cuam ntawm lwm tug ntawm pawg ntseeg
lawv le lub Rooj Tsaavxwm pum zoo kuas nwg ua. Puab yuav tsum khaws tej nyaj txag kws tso moog paab rua tej dlejnum ntawd
hab siv tej nyaj ntawd moog lawv le tau npaaj tseg lawm. Yog thaus twg, muaj ib tug tswvcuab tau taag sim neej, puab yog cov
kws coj pawg ntseeg tej tshaav ntuj moog cob rua tsev xyom cuab ntawd hab paab dlha teg dlejnum rua lub nteeg ntawd, yog tsev
xyomcuab thov txug. Txhua lub sijhawm kws tuaj pehawm Vaajtswv, puab yog cov sau nyaj, suav nyaj, hab muab tej nyaj ntawd
teev ca rua huv ntaub ntawv tseg. Tshaaj le ntawd, puab yog cov saib kev ruaj ntseg lub sijhawm suavdlawg pehawm Vaajtswv.
Feem 3. Cov Nam Ncig Num.
Cov nam ncig num yuav tsum raug taw lossis raug xaiv lug ua tej dlejnum tshwjxeeb
xwsle; saib teg dlejnum kev nojhaus ntawm tej puj ntsoj puj ntsuag kws txom nyem hab thaus puab muaj mob muaj nkeeg. Lub sijhawm
pehawm Vaajtswv, puab yog cov suav tuabneeg saib cov tuaj pehawm Vaajtswv nub ntawd coob le caag. Puab yuav tau teev kuas
meej has tas; cov txivtsev, cov namtsev, cov mivnyuas yau, hab cov qhua muaj pitsawg leej. Tshaaj le ntawd, puab yuav tau
teev txug cov tswvcuab kubsab hab cov tsi kub sab ca rua huv ntawv. Tom qaab puv rau (6) lub hlis lawd, puab yuav tau tshaabxu
rua Lub Rooj Tsaavxwm paub.
Feem 4. Cov Saib Kev kawm Nubkaaj.
Tsaa ib paab lug saib phaab kev kawm, paab
nuav yuav tsum muaj yaam tsawg yog 3 leeg. Cov nuav yuav tsum muaj tug thawj, tug teev ntawv, hab tug ca nyaj. Puab yog cov
nrhav tej ntaub ntawv lug qha kuas phim rua txhua phaab tuabneeg, nrhav txhua tug xwbfwb lug qha txhua chaav tsi has cov laug,
cov hluas hab cov mivnyuas yau. Puab muaj cai khaiv hab saamfwm txhua tug txivtsev, namtsev, hab tub ntxhais hluas lug ua
xwbfwb qha Nubkaaj. Puab muaj cai thov hab kom peev nyaj lug siv rua kev qha Nubkaaj lawv le puab lub homphaj. Ib lub hlis
twg, puab yuav tau muab cov nyaj Nubkaaj txav tawm pebcaug feem pua (30%) xaa moog rua Hauvpaug Koomhum Moob Qha Txuj Moo
Zoo lawv le kevcai.
Feem 5. Koomhum Namtsev
Koomhum namtsev yuav tsum raug tsim tsaa nyob rua huv pawg
ntseeg hab cov tsaavxwm yuav tsum raug xaiv lawv le kevcai lijchoj huv koomhum namtsev kws muaj nyob ntawm Cov Ntseeg Yexus
hab Kev Koomteg Qha Txuj Moo Zoo. Dlhau le Koomhum namtsev lub homphaj lawd, puab yog ib feem ntawm pawg ntseeg lub dlaag
lub zug hab yog pawg ntseeg tej teg taw kws yuav txhawb kuas pawg ntseeg vaam meej. Pawg ntseeg muaj cai siv koomhum namtsev
huv pawg ntseeg lug paab dlejnum txhua yaam lawv le lub Rooj Tsaavxwm huv pawg ntseeg pum zoo.
Feem 6. Koomhum
Txiv Tsev
Yuav tsum tau tsaa kuas muaj Koomhum Txivtsev hab cov tub tsaavxwm yuav tsum raug xaiv tsaa lawv le Kevcai
Lijchoj ntawm Koomhum Txivtsev kws muaj nyob rua huv phoo kevcai ntawm Cov Ntseeg Yexus hab Kev Koomteg Qha Txuj Moo Zoo.
Koomhum txivtsev huv pawg ntseeg yog ib feem ntawm pawg ntseeg lub dlaag lub zug. Puab yuav tau txhawb hab paab dlejnum txhua
yaam huv pawg ntseeg tsi has saab ntsujplig losis saab nqajtawv. Pawg ntseeg muaj cai siv koomhum txivtsev lug ua txhua yaam
dlejnum lawv le Lub Rooj Tsaavxwm huv pawg ntseeg pum zoo.
Feem 7. Koomhum Hluas
Yuav tsum tau tsaa kuas muaj
Koomhum Hluas hab cov tsaavxwm hluas yuav tsum raug xaiv tsaa moog lawv le kevcai lijchoj ntawm Koomhum Hluas kws muaj nyob
huv phoo Kevcai Lijchoj ntawm Cov Ntseeg Yexus hab Kev koomteg Qha Txuj Moo Zoo. Cov hluas yog tug txhaa nqaajqaum ntawm pawg
ntseeg. Puab yuav tau txhawb hab paab pawg ntseeg ua txhua yaam dlejnum lawv le lub Rooj Tsaavxwm pum zoo tso rua puab ua.
Feem 8. Paab Tsaavxwm Saib Kev Xaa Moo Zoo.
Yuav tsum tsaa muaj paab tsaaxwm saib Kev Xaa Txuj Moo Zoo lug paab xwbfwb tswj saib dlejnum Xaa Moo
Zoo hab nrhav hauv kev lug txhawb lub rooj txhawb nqaa Kev Xaa Moo Zoo txwm xyoo ntawm pawg ntseeg, paab nrhav tuabneeg moog
xaa Moo Zoo, hab nrhav nyaj txag moog txhawb Cov Ntseeg Yexus hab Kev koomteg Qha Txuj Moo Zoo teg dlejnum kws nyob thoob
plawg nplajteb (Rooj saablaaj luj 1984).
PHAAJ XIII LUB ROOJ TXHAWB NQAA KEV
XAA MOO ZOO
Pawg ntseeg
yuav tsum tsaa muaj Lub Rooj Txhawb Nqaa Kev Xaa Moo Zoo ib xyoos ib zag lug txhawb hab paab cov ntseeg Yexus hab Kev koomteg
Qha Txuj Moo Zoo teg dlejnum kws nyob thoob plawg nplajteb.
PHAAJ XIV-QUBTXEEG QUBTEG & NTAUB NTAWV
Feem
1. Pawg Ntseeg Tej Qubtxeeg Qubteg.
Pawg ntseeg nuav muaj cai nrhav, muaj cai yuav txhua yaam khoom siv lug ua pawg
ntseeg ndlagtug, muaj cai muab tso tseg, muaj cai txim khu, muaj cai nce nqe hab nqeg nqe. Tabsis tej qubtxeeg qubteg kws
yuav raug yuav lug, yuav raug muag tawm, yuav raug ntsaig moog lug, yuav raug muab pauv, yuav raug muab yuam nqe, hab yuav
raug muab nce nqe, yuav tsum yog pawg ntseeg pum zoo kws yog lug ntawm lub Rooj Tsaavxwm nrug rua taag nrho tsoom tswvcuab
huv pawg ntseeg.
Feem 2. Tej Ntaub Ntawv.
Tej ntaub ntawv ntawm txhua tug tub tsaavxwm huv pawg ntseeg hab
taag nrho txhua paab txhua pawg puav leej yog pawg ntseeg le qubtxeeg qubteg. Tej ntaub ntawv teev nyaj txag, ntuab ntawv
yuav khoom, hab ntaub ntawv teev txug pawg ntseeg tej khoom siv txhua yaam yuav tsum tau tshuaj ib xyoo twg ib zag hab muab
khaws ca kuas zoo tsi pub poob.
Feem 3. Tug Saib Qubtxeeg Qubteg Teg Dlejnum.
Nwg yuav tau teev pawg ntseeg
tej khoom vaaj khoom tsev, hab cuab yeej toomtxeem txhua yaam kws yog pawg ntseeg le huvsi tso rua huv ntaub ntawv. Nwg yuav
tau teev kuas meej has tas, cov khoom ntawd yog dlaab tsi? Lub npe hu le caag? Tug lej serial number yog le caag? Yaam khoom
ntawd tug nqe yog pitsawg? Hab cov khoom ntawd yaam twg nyob rua qhov twg lawm. Nwg yuav tau tshaabxu rua lub rooj saablaaj
ntawm txhua phaab dlejnum paub thaus muaj saablaaj (quarterly meeting) lossis rua Lub Rooj Tsaavxwm huv pawg ntseeg paub.
Feem 4. Kev Qev Pawg Ntseeg Tej Khoom Moog Siv.
Tug saib qubtxeeg qubteg muaj cai tswj pawg ntseeg tej khoom
txhua yaam kuas zoo npaum le yuav zoo tau, txwv tsi pub ib leeg tug twg qev ib yaam dlaab tsi moog siv yog has tas tsi tau
lug tso cai lug ntawm Lub Rooj Tsaavxwm. Yog ib tug tswvcuab twg losis ib paab ib pawg twg xaav qev ib yaam dlaab tsi moog
siv, tug ntawd losis paab ntawd yuav tau sau ntawv moog thov kev tso cai ntawm Lub Rooj Tsaavxwm hab tug saib qubtxeeg qubteg.
Yog puab pum zoo hab tso cai mas tug ntawd hab paab ntawd maam qev tau. Tabsis tsuas tso cai qev tau rua cov ntseeg Vaajtswv
xwb.
PHAAJ XV PAAB KAAVXWM SAIB KEV XAIV TSAA
Feem 1. Xaiv Paab Kaavxwm Saib Kev Xaiv Tsaa
Yuav tsum muaj
ib paab saib kev xaiv tsaa ib vuag kws yog muaj 5 leeg; tug thawj yuav tsum yog xwbfwb, muaj ob tug yog lub Rooj Tsaavxwm
ua cov xaiv, hab muaj ob tug yog pawg ntseeg ua cov xaiv. Paab nuav puab yuav tsum xaiv ua ntej lub rooj saablaaj txwm xyoo
yaam tsawg ib lub hlis. Yog pawg ntseeg tsi muaj xwbfwb, lub Rooj Tsaavxwm yuav tau has rua Thawj Tsaavxwm ntawm Hauvpaug
Koomhum Moob paub saib nwg yuav xaa leej twg tuaj losis nwg yuav tso cai rua leej twg ua tug tswj kev xaiv tsaa.
Feem 2. Lub Sijhawm Xaiv Tsaa.
Lub sijhawm xaiv tsaa, yog yuav pib rua huv lub 11 hli ntuj moog txug thaus taag.
Feem 3. Cov
Xaiv Tsaa Teg Dlejnum.
Ua ntej yuav pib kev xaiv tsaa, cov kaavxwm yuav tau nrhav txhua tug lug nyob rua txhua lub meej mom
xwsle:
A. Lub Rooj Tsaavxwm:
1.) Paab txwjlaug (tsi pub qeg tshaaj 2 leeg rov rua huv)
2.)
Tug teev ntawv
3.) Tug ca nyaj
B. Lwm tug tub tsaavxwm:
1.). Tug Ca Nyaj
Tshaajtawm Txuj Moo Zoo
2.) Tug Saib Kev Tshaajtawm Txuj Moo Zoo
3.)
Cov Tub Ncig Num
4.) Cov Nam Ncig Num
5.) Tug Saib Kev Kawm Nubkaaj
6 ) Tug Saib Qubtxeeg Qubteg
7.) Tug Saib Kev Hunkauj hab Komtswj
8.) Tug Tuavxaam
Ntawm Cov Hluas (youth adviser)
9.) Tug Nrhav Nyaj
10). Thawj Namtsev
11.) Thawj
Txivtsev
12.) Thawj Tub Ntxhais Hluas
13.) Hab lwm tug kws lub Rooj Tsaavxwm pum zoo tsaa.
Feem
4. Cov Muaj Cai Tawmsuab Pov Ntawv.
Tug kws muaj cai tawm suab pov ntawv, tug ntawd yuav tsum yog ua tswvcuab rua
huv pawg ntseeg, yuav tsum ua kevcai rausdlej, yuav tsum muaj noob nyoog 16 xyoo rov rua sau.
Feem 5. TawmsuabTw xaiv.
a. Lub sijhawm xaiv tsaa, yog qheb ib lub meej mom twg lug tw xaiv, tabsis yog tug kws tsoom tswvcuab taw lug dlaws
dlim lawd, tes cale yuav cov tub xaiv tsaa tug xwb.
b. Ib tug tswvcuab twg, nwg tsuas muaj cai taw tau ib leeg lug
xaiv nyob rua ib lub meej mom xwb.
c. Tsoom tswvcuab muaj cai taw tau plaub tug tub saib kev xaiv tsaa lug xaiv tabsis
puab plaub tug ntawd tsi muaj cai rov taw puab lug tw xaiv rua ib lub meej mom twg.
d. Yog tug twg tub raug lwm tug taw
nwg lub npe lug tw xaiv rua ib teg num lawm, tug ntawd tsi muaj cai taw lwm ntxiv lawm.
e. Kev taw npe rua ib lub meej
mom twg, yuav qheb rua txhua tug taw moog txug thaus tsi muaj leej twg kaam taw lawm lossis taw moog txug thaus muaj tug tawmsuab
txwv tsi pub taw ntxiv lawm.
f. Txhua tug kws yog cov tub saib kev xaiv tsaa tub taw tau lug nyob rua ib lub meej mom
twg lawd, tsoom tswvcuab tsi muaj cai taw tug ntawd moog tw xaiv rua lwm teg dlejnum tshwj tug kws poob lawm xwb.
g. Tsoom
tswvcuab tsi muaj cai taw tug kws tsi tuaj nub ntawd lug tw xaiv rua ib lub meej mom twg, tshwj tug kws cov kaavxwm saib kev
xaivtsaa tub nrug nwg thaam taag lawm xwb kuas tug ntawd muaj dlejnum ti-teg ti-taw moog lawm.
Feem 6. Kev Pov Ntawv
a. Yog muaj txug ob leeg rov rua sau lug sib tw xaiv rua ib teg dlejnum twg lawm, yuav tsum tau pov ntawv. Hab yog
leej twg tau suab ntau dlua tes ca tug ntawd ua.
b. Yog muaj tshaaj ob (2) leeg rov rua sau lug sis tw xaiv tabsis ob
tug kws yeej tau suab sis npaug, yuav tsum tau muab ob tug rov lug pov ntawd dlua lwm ob. Yog lwm ob, ob tug rov qaab tau
suab sis npaug dlua tes lwm peb cale rhu ntawv lawm xwb, yog rhu tau leej twg npe tes ca tug ntawd ua.
Feem 7. Kev
Dlaws Dlim
Yog thaus ib tug twg raug taw lug sis tw rua ib lub meej mom twg, tabsis tug ntawd lug tawm suab has
has tas nwg tsi kaam ua nua tes cov kaavxwm saib kev xaivtsaa cale tso nwg dlim hab tsi muaj cai yuam kuas nwg yuav tsum lug
dlaws nwg zaaj rua suavdlawg noog.
PHAAJ XVI - KEV SAABLAAJ
Feem 1. Pawg Ntseeg Kev Saablaaj.
Pawg ntseeg muaj 4 yaam kev
saablaaj le huv qaab nuav:
a. Lub Rooj Saablaaj Txwm Xyoo.
Ib xyoos twg pawg ntseeg yuav tau tsaa muaj lub rooj saablaaj txwmxyoo
ib zag lug rua tsoom tswvcuab tuaj saablaaj uake. Lub homphaj ntawm lub rooj saablaaj nuav yog tsaa lug txwm khu pawg ntseeg
tej homphaj, dlaws pawg ntseeg tej teebmeem, kom peev nyaj rua pawg ntseeg siv, khu pawg ntseeg tej kevcai lijchoj ntxiv hab
xaiv cov tsaavxwm tshab. Txhua tug tswvcuab kws muaj noob nyoog 16 xyoo rov rua sau hab txhua tug kws ua kevcai rausdlej lawd,
muaj cai tuaj koom tau lub rooj saablaaj txwm xyoo nuav.
b. Lub Rooj Saablaaj Ntawm Txhua Phaab Dlejnum.
Lub rooj
saablaaj nuav yog tsaa lug rua txhua phaab dlejnum huv pawg ntseeg saablaaj xwsle; kev tshaabxu txug puab cov dlejnum dlhau
lug hab has cov dlejnum tshab kws tseem yuav ua rua 3 lub hlis tom hauv ntej. Lub rooj saablaaj nuav, ib xyoos twg muaj 4
zag lossis 3 lub hlis twg ib zag. Lub sijhawm yog yuav muab tso rua lub limtam kawg ntawm txhua 3 lub hlis. Txhua tug tsaavxwm
kws tuav dlejnum nyob rua txhua phaab muaj cai tuaj koom tau.lub rooj saablaaj nuav.
c. Lub Rooj Saablaaj Ntawm Lub Rooj
Tsaavxwm.
Lub rooj saablaaj nuav, ib hlis twg muaj ib zag hab lub sijhawm yog yuav muab tso rua lub limtam kawg ntawm
txhua lub hlis. Cov kws muaj cai tuaj koom lub rooj saablaaj nuav yog xwbfwb, paab txwjlaug, tug teev ntawv, tug ca nyaj,
hab tug paab tug ca nyaj. Lub rooj saablaaj nuav yog tsaa lug rua cov tsaavxwm huv Lub Rooj Tsaavxwm lug saablaaj, lug tshaabxu
txug puab tej dlejnum ntawm lub hlis ntawd, hab lug thov Vaajtswv paab rua pawg ntseeg tej dlejnum. Hab lug tshuaj saib tshuav
yaam dlejnum twg kws tseem ua tsi tau tav kws yuav tsum muab ua kuas tav.
d. Lub Rooj Saablaaj Ti-teg Ti-taw (Emergency
Meeting). Lub rooj saablaaj nuav yuav tsi teem caij rua ib lub sijhawm twg, nyob ntawd muaj dlejnum tshwm tuaj xwb. Yog thaus
twg muaj dlejnum ceev tes lub Rooj Tsaavxwm maam hu suavdlawg tuaj thaam hab saib yaam dlejnum ntawd cuamtshuam rua paab twg
tes maam hu paab ntawd tuaj thaam. Tabsis yog tsi muaj kev cuamtshuam rua ib paab pawg twg hab ib tug tswvcuab twg tes tsuas
yog hu cov tsaavxwm huv Lub Rooj Tsaavxwm tuaj thaam xwb.
Feem 2. Txuj Cai Tswj Rooj Saablaaj.
Txhua zag kws muaj kev saablaaj, tsi has saablaaj txwm xyoo, saablaaj ntawm txhua phaab dlejnum, saablaaj
huv lub Rooj Tsaavxwm, hab saablaaj ti-teg, ti-taw. Lub rooj saablaaj yuav tau siv tug qauv tswj kev saablaaj kws hu ua, Roberts
Rules of Order lug tswj kev saablaaj txhua txhua zag. Hab txhua zag kws cov sawvcev tuaj saablaaj, tsuav yog tuaj txug le
ib feem peb (1/3) lawm tes muaj ca saablaaj tau, kuas yog tuaj tsi txug ib feem peb tes yuav tau muab ncua rua lwm zag.
PHAAJ
XVII - TEJ KAAB KE
Feem 1. Kaab Tshoob Kev Kug
a. Peb pum has tas yuav kuas hum le Vaajtswv sab, tsi pub tej
tub ntxhais nyob uake ua ntej sis yuav.
b. Kev sis yuav, txwv tsi pub nqug, tsi pub caum, los yog haub moog ntsag tu.
c. Xaav kuas muaj kev has tshoob huv tsev. Kev has tshoob yuav tsum muaj mejkoob, hab txwv tsi pub coj tug xwbfwb los
yog thawj txwjlaug huv pawg ntseeg moog sawvcev mej koob. Yog zoo, tug mejkoob yuavtsum yog ib tug kws paub kevtshoob kevkug
hab yog ib tug kws ntseeg Vaajtswv.
d. Txwv tsi pub coj lub kaus moog has tshoob. Lub Rooj saablaaj xyoo 1984, nyob Covenant
Heights Bible Camp, Estes Park, Colorado tub yeej pum zoo le has lug nuav lawm.
e. Txwv tsi pub pe, siv cawv (Beer) hab
luam yeeb lug txuam yuaj rua huv rooj tshoob kws yuav ua rua lub neej ntawm tug ntseeg Yexus puam tsuaj. Peb pum zoo ca muab
dlej qaab zib lossis muab phaaj ntxuag lug hloov cawv ntsim hab luam yeeb.
f. Txwv tsi pub muaj kev sis tib le ib txwm
pheej muaj lug. Yog tej tub ntxhais has meej lawm has tas tsi yeem, yuav tau tso tseg tsi pub thov kuas tib los yog lam cai
kuas tib.
g. Tej tub ntxhai yau tshaaj le numtswv kevcai, yog tsi tau lug tso cai ntawm nuntswv ua ntej qua tsi tau. Yog
namtxiv pum zoo qua hab tug ntxhais yeem lawm los nyob tsi dlua ntawm namtxiv, tabsis txwv tsi pub tug xwbfwb los pawg ntseeg
ua kevcai txis hab suam dlaim ntawv sis yuav vim tsi tau lug tso cai ntawm numtswv xeev.
h. Txhua nkawm namtxiv kws tug
xwbfwb los yog pawg ntseeg yuav ua tau kevcai txis, yuav tsum yog ob tug xub ua tau ntawv tso cai ntawm nomtswv lawm xwb.
i. Txhua nkawm namtxiv kws yuav ua kevcai txis huv lub tuamtsev, yuav tsum yog tug tub hab tug ntxhais puav leej yog cov
ntseeg Yexus hab ua tau lub neej lawv le Vaajtswv lub sab nyam.
j. Yog muaj ib tug ntawm nkawm namtxiv yuav sis txis ntawd
yog tug ntseeg, hab yog tug xwbfwb los pawg ntseeg raug caw moog thov Vaajtswv rua ob tug los kuj moog tau. Hab yog muaj ntaub
ntawv ntawm numtswv los paab suam npe rua, kuas yuav yog ob tug ob leeg puav leej txwm noob nyoog lawm.
k. Peb pum has
tas kev tshoob kug yog kev tsaa hab txis tej hluas ua neej lawv le Vaajtswv ib txwm pum zoo lawd. Yog le ntawd, cov ntseeg
tsuas muaj khoom pub xwb tsi tsim nyog muaj nqe tshoob.
Feem 2. Kev Fij Mivnyuas
Txhua tug mivnyuas tsi has
tub hab ntxhais, yog namtxiv txaus sab coj tuaj fij rua Vaajtswv lawd, tug xwbfwb losis tug thawj txwjlaug yuav tau ua kevcai
fij. Pawg ntseeg yuav tsi muaj kev txwv qhov nuav hlo le.
Feem 3. Kev Pluj Tuag.
Kev pluj tuag yog ib qhov
kws muaj feem luj rua saab kev ntseeg Vaajtswv. Peb cov Moob Ntseeg Yexus txhaj pum has tas, qhov nuav tsim nyog yuav coj
moog le nraag nuav:
a. Peb txhua tug kws ntseeg Yexus zoo le ib tsev tuabneeg, yog muaj ib tug twg tso nplajteb tseg nyob
huv pawg ntseeg lawm, pawg ntseeg yuav tau paab dlaag zug hab dlejnum nrug cov xyomcuab lug ntawm lub sab dlawb paug.
b.
Yuav muaj nyaj sab dlawb ntawm cov tswvcuab huv pawg ntseeg ua ibke tsi has tau ntau hab tsawg los zoo, coj lug paab tsev
xyomcuab tam qhua. Kev yuav tam qhua luj hab miv nyob ntawm tsev xyomcuab yuav ua, txwv tsi pub ntaim.
c. Pawg ntseeg
kev paab tshaav ntuj muaj 2 yaam xwsle:
1. Tug kws yog tswvcuab huv pawg ntseeg, tsi has laug,
hluas, hab mivnyuas yau tau taag simneej, pawg ntseeg
yuav paab $100.00 nyaj ntsuab,
ib lub paaj ntoo tug
nqe $80.00 ntxiv rua se, hab nqe xaa, hab ib naab ntsab
100 pound.
2. Tug kws tsi yog tswvcuab,
pawg ntseeg tsuas paab
$30.00 nyaj xwb tes taag le ntawd.
d. Kev qhuab qha Vaajlugkub hab kevcai coj tug tso nplajte lub cev moog zais, yog dlejnum ntawm tug
xwbfwb hab pawg ntseeg yuav paab ua rua tsev xyomcuab lawv le tsev xyom cuab nyam hab muaj peevxwm ua tau.
e. Yog muaj
ib tug tsi ntseeg tso nplajteb tseg hab puab thov tug xwbfwb losis pawg ntseeg moog qha Vaajtswv Txujlug rua tsev xyomcuab
ntawd, tug xwbfwb los pawg ntseeg moog tau tabsis txwv tsi pub ua kevcai coj moog log xwb.
f. Yog ib tug ntseeg twg muaj
kev tso nplajteb tseg, cov xyomcuab moog coj cov tsi ntseeg tuaj ua kevcai dlaab qhuas rua mas pawg ntseeg hab xwbfwb yuav
tsi ua kevcai hab yuav tsi paab dlejnum rua tug ntawd lub nteeg le.
PHAAJ XVIII - PAWG NTSEEG QAUG
Ua ntej
pawg ntseeg yuav qaug taug, yuav tsum yog pawg ntseeg poob moog rua cov xwmtxheej zoo le huv nuav mas txhaj kaw tau:
1.
Yog tswvcuab poob qeg tshaaj le 25 leeg rov rua huv lawm hab yeej tsi muaj ib tug twg kaam lug tuav pawg ntseeg ntxiv lawm
mas txhaj yuav kaw tau hab,
2. Yog cov tswvcuab tsiv moog nyob rua lwm lub zog hab moog lu rua lwm pawg ntseeg taag
lawm hab,
3. Yog pawg ntseeg ua txhum numtswv kevcai hab raug numtswv yuam kuas muab kaw.
4. Ua ntej yuav
muab pawg ntseeg kaw le kws has lug sau nuav, yuav tsum yog cov tswvcuab kws tseem nyob lug tawm suab pum zoo txug ob feem
peb (2/3) mas txhaj kaw tau. Hab lub sijhawm kaw ntawd yuav tsum yog muaj ib tug sawvcev Hauvpaug Koomhum Moob tuaj ua tug
kaw.
5. Kev cob qubtxeeg qubteg tes yuav tau ua lawv nraim le tub teev tseg nyob rua ntawm Phaaj II Kev Zwm.
6.
Kev faib qubtxeeg qubteg. Yog ib tug tswvcuab twg tsiv moog nyob rua ib qhov chaw twg lossis tawm moog zwm rua ib pawg ntseeg
twg lawd, tug tswvcuab ntawd tsi muaj cai thov faib ib yaam dlaab ntawm pawg ntseeg. Hab yog ho muaj ib paab tawm moog nyob
rua ib thaaj chaw twg los moog zwm rua ib paab ntseeg twg los puab yeej tsi muaj cai nrug pawg ntseeg faib qubtxeeg qubteg
ib yaam nkaus hab.
PHAAJ XIX HLOOV HAB KHU KEVCAI LIJCHOJ
1. Phoo kevcai lijchoj nuav, yeej muaj cai muab
hloov hab khu kuas zoo siv lawv le pawg ntseeg lub homphaj tabsis ua ntej yuav hloov hab yuav khu ib yaam dlaab tsi, yuav
tsum yog tau kev tso cai lug ntawm ib tsoom tswvcuab huv pawg ntseeg.
2. Ua ntej phoo kevcai lijchoj nuav yuav siv
tau, yuav tsum yog coj lug tawmsuab pum zoo rua huv lub rooj saablaaj txwm xyoo losis coj lug tawm suab pum zoo lug ntawm
ib tsoom tswvcuab txug suab 2/3 mas txhaj siv tau.
3. Txwv tsi pub ib leeg tug twg khu hab hloov ib lu lug twg hab
ntxiv ib lu lug twg rua huv phoo kevcai lijchoj ntxiv nuav, yog has tas tsi tau kev tso cai lug ntawm lub Rooj Tsaavxwm hab
ntawm tsoom Tswvcua huv pawg ntseeg.
